జైలర్ 2’పై భారీ అంచనాలు.. ₹350 కోట్ల బడ్జెట్‌తో సూపర్‌స్టార్ మూవీ?

జైలర్ 2’పై భారీ అంచనాలు.. ₹350 కోట్ల బడ్జెట్‌తో సూపర్‌స్టార్ మూవీ?

సూపర్‌స్టార్ రజనీకాంత్‌ ప్రధాన పాత్రలో దర్శకుడు నెల్సన్ దిలీప్‌కుమార్ తెరకెక్కిస్తున్న ‘జైలర్ 2’పై భారీ అంచనాలు నెలకొన్నాయి. సన్ పిక్చర్స్ నిర్మిస్తున్న ఈ సీక్వెల్‌ను భారీ స్థాయిలో రూపొందిస్తున్నట్లు సినీ వర్గాల్లో ప్రచారం జరుగుతోంది.

‘జైలర్ 2’ కోసం సుమారు ₹350 కోట్ల బడ్జెట్‌ను కేటాయించినట్లు, బాక్సాఫీస్‌ బిజినెస్‌ పరంగా సుమారు ₹600 కోట్ల టార్గెట్‌ను పెట్టుకున్నట్లు సమాచారం. అయితే ఈ గణాంకాలపై చిత్రబృందం నుంచి అధికారిక ప్రకటన రావాల్సి ఉంది.

రజనీకాంత్‌ రెమ్యునరేషన్‌ ఎంత?

ఈ భారీ ప్రాజెక్ట్‌ కోసం రజనీకాంత్‌ సుమారు ₹125 కోట్ల రెమ్యునరేషన్‌ తీసుకుంటున్నట్లు టాక్ వినిపిస్తోంది. దీనికి అదనంగా సినిమా లాభాల్లో వాటా కూడా ఉండే అవకాశం ఉందని సినీ వర్గాలు చెబుతున్నాయి. అయితే దీనిపైనా అధికారిక ధృవీకరణ లేదు.

500–600 మంది సిబ్బందితో షూటింగ్

‘జైలర్ 2’ షూటింగ్‌ కూడా భారీ స్థాయిలో జరుగుతున్నట్లు తెలుస్తోంది. ప్రతిరోజూ సుమారు 500 నుంచి 600 మంది వరకు సిబ్బంది షూటింగ్‌లో పాల్గొంటున్నట్లు సమాచారం. ఇటీవల ఆదిత్య రామ్ స్టూడియోలో 51 కారవాన్లతో భారీ ప్యాచ్‌వర్క్ షెడ్యూల్‌ పూర్తయినట్లు తెలుస్తోంది.

‘U/A’ సర్టిఫికెట్‌పై ఫోకస్?

ఇదిలా ఉండగా.. రజనీకాంత్‌ గత చిత్రం ‘కూలీ’కి ‘A’ సర్టిఫికెట్ రావడం కుటుంబ ప్రేక్షకులపై ప్రభావం చూపిందన్న చర్చ జరిగింది. ఈ నేపథ్యంలో ‘జైలర్ 2’ విషయంలో కంటెంట్‌ను మరింత జాగ్రత్తగా రూపొందిస్తున్నట్లు సమాచారం.

సినిమాలో రక్తపాతం, హింసాత్మక సన్నివేశాలను వీలైనంత వరకు తగ్గించి, కుటుంబ ప్రేక్షకులు కూడా థియేటర్లలో చూసే విధంగా సినిమా ఉండాలని రజనీకాంత్‌ సూచించినట్లు టాక్‌ వినిపిస్తోంది. ఈ క్రమంలో ‘U/A’ సర్టిఫికెట్‌ లక్ష్యంగా చిత్రబృందం పనిచేస్తున్నట్లు తెలుస్తోంది.

అయితే సినిమా పూర్తయిన తర్వాత సెన్సార్ ప్రక్రియలోనే తుది సర్టిఫికేషన్‌పై స్పష్టత రానుంది.

‘జైలర్’ సాధించిన భారీ విజయంతో ‘జైలర్ 2’పై ఇప్పటికే అంచనాలు పెరిగాయి. రజనీకాంత్‌, నెల్సన్ కాంబినేషన్‌ మరోసారి ప్రేక్షకులను ఎలా ఆకట్టుకుంటుందో చూడాలి.