ఆ వయసు చిన్నారులు తప్పనిసరిగా మాస్క్ ధరించాలి..

మాస్క్‌లు ధరించడం వల్ల కరోనాా వ్యాప్తిని నియంత్రించడం సులభమని, ప్రతి ఒక్కళ్లూ దీనిని తప్పకుండా పాటించాలని వైద్య నిపుణులు సూచిస్తుండగా.. డబ్ల్యూహెచ్ఓ సైతం

కరోనా వైరస్ వ్యాప్తిని అడ్డుకోవాలంటే భౌతికదూరం నిబంధన సహా తప్పనిసరిగా మాస్క్ ధరించాలని ప్రపంచ ఆరోగ్య సంస్థతోపాటు వైద్య నిపుణులు సూచిస్తున్నారు. అయితే, పిల్లలు మాస్క్‌లు ధరించడంపై భిన్నాభిప్రాయాలు వ్యక్తమవుతున్నాయి. ఈ నేపథ్యంలో డబ్ల్యూహెచ్ఓ పిల్లలు మాస్క్‌లు ధ‌రించడంపై మార్గదర్శకాలను విడుదల చేసింది. తాజా గైడ్‌లైన్స్‌ ప్రకారం.. 12 ఏళ్లు దాటిన పిల్లలు కూడా పెద్దల మాదిరిగానే మాస్కులు త‌ప్ప‌నిస‌రిగా ధరించాలి. 12 ఏళ్లు దాటిన చిన్నారులకు పెద్దల మాదిరిగానే కరోనా వచ్చే ముప్పు ఉందని డబ్ల్యూహెచ్ఓ పేర్కొంది. ఐదేళ్లలోపు చిన్నారులు మాస్కులు ధరించడం తప్పనిసరి కాదని, వీరికి కరోనా వచ్చే ప్రమాదం చాలా తక్కువ అని స్పష్టం చేసింది. కానీ, 6 నుంచి 11 ఏళ్లోపు పిల్లలు రద్దీ ఎక్కువగా ఉన్న ప్రదేశాలకు వెళ్లిన‌ప్పుడు త‌ప్ప‌నిస‌రిగా మాస్కులు ధ‌రించాలి. కానీ, చిన్నారులు ఆటలాడుకునే సమయంలో మాస్కులు ఉపయోగించవద్దని సూచించింది. అయితే, ఆడుకునేట‌ప్పుడు ఆట స్థలంలో పరిమిత సంఖ్యలోనే ఉండి, పిల్ల‌లు భౌతికదూరం పాటించాల‌ని తెలిపింది.

పిల్లలు మాస్క్‌లు ధరించే సామర్థ్యం, పెద్దల పర్యవేక్షణ, వాటిని ధరించడం వల్ల ప్రభావం వంటి అంశాలను కూడా ఈ సందర్భాలలో పరిగణనలోకి తీసుకోవాలని నొక్కి చెప్పింది. అలాగే, కేన్సర్, సిస్టిక్ ఫైబ్రోసిస్‌ వంటి అనారోగ్య సమస్యలు ఎదుర్కొనే చిన్నారులు మెడికల్ మాస్క్‌లు ధరించడం వల్ల మరింత రక్షణగా ఉంటుందని పేర్కొంది. ఎదుగుదలలో ఇబ్బందులను ఎదుర్కొంటున్న పిల్లలు మాస్క్‌లు ధరించడం తప్పనిసరి కాదని, ఇలాంటి కేసులలో తల్లిదండ్రులు, సంరక్షకులు, వైద్య సిబ్బంది అంచనా వేయాలని కూడా తెలిపింది. ప్రపంచవ్యాప్తంగా ఇప్పటి వరకూ 2.3 కోట్ల మందికి వైరస్ సోకగా.. ఎనిమిది లక్షల మందికిపైగా ప్రాణాలు కోల్పోయారు. అత్యధికంగా అమెరికా, బ్రెజిల్, భారత్‌లో కేసులు నమోదయ్యాయి.